martes, 5 de junio de 2007

Gudbrandsdal

El Sol que nun quier morrer ya vei tirando yá pal Norte, un cielu que nun yía a cambiar la color encarnada pola escuridá de la nueite, arbolinos pequenos semando la chanada, escondiendo tres d'el.los espeyos: Flaksjøen, Urdtjønnet, Søre Fyskeløyse, Stormyrtjønnet, Frisketjønnet. L'augua, esi augua que da vida a la tierra en forma de regueiros ya l.lagunas que ruempen la monotonía d'un paisaxe sólidu, quietu, sele. Ya al.lacul.ló los montes, zarrando'l val.le ya las prietas matas punde escazolan los trolls.



Una l.laguna chena de tierra, el sol que muerre dando aliendu a un paisaxe desnudu de piel queimada, la tranquilidá y lo sólido de lo qu'acaba. Eiquí nun hai cuélebre que s'escuenda na mata del val.le, marchóu cola xente, l.luenxe, a morrer nuna ciudá, seique n'outru país p'acul.ló del mar.

Dos mil kilómetros ente dúas mentalidades, la una que siguíu'l sou camín, la outra que siguíu'l camín que-y mandanon. Dende la viva tranquilidá de los l.lugares ya montes de Gudbrandsdal a la triste agonía d'un pueblu qu'espera, sele, la súa muerte. Ya mientres nós ¿quéi? ¿mirarémos un pouco pa esos que l.luitanon ou seguiremos esperando colos güeyos puestos neso que vei venir a salvanos, que d'un día pa outru vei poner las cousas no sou sitiu, eso que chaman quimera?
Entrín ya non, afogámonos.

8 comentarios:

Dígotelo yo dijo...

¡Bones collaciu!

Déxote esti mensaxe porque paezme que tamos nes mesmes: entamando un blog ya intentando axuntar voluntá pa continualu. Dende la solidaridá, munchu ánimu y norabona pol to blog (ya hai un occidentalista más na blogsfera asturiana, que faen falta).
Una entruga, ¿escribes dende Ayande o tas espatriáu al centru?

Ayandés dijo...

Tou espatriáu nin, vivo en Xixón dende que nací, pero la casa de la familia siempre tira. Vou mirar el tou blog, qu'inda nun lu conozo.

Salú

Ayandés dijo...

Perdón, dixi "nin" ya veo no tou blog (por cierto, ta bien guapu) que sos "nina". Las malas costumes d'esta sociedá, que damos muitas cousas por feitas.

trAsgU d´aRecEs dijo...

Mui guapu´l blog y n´occidental presta muncho más.

Vais garrando puxu, que you conoza tu, MunduXaime y Esfarrapando´l mundu n´asturianu occidental. Hai dalgún más? Bono ensin cuntar los tres o cuatro qu´hai per Llión, pero esos son en lliones que yía una cousa que ná tien que ver col asturianu (según dalgún d´el.los co que tuvi´l "placer" de falar).

Tal.lou y a siguir dando-ys vida a las pal.labas más guapas n´asturianu (y dizlo ún d´Avilés)

Ayandés dijo...

¡Hola Trasgu d'Areces! vese que diesti con xente de Conceyu Xoven ¿a que nun m'equivoco? :D Esos fadránse pasar por l.lionesistas pero nun sei si sedrán a marcar el sou país nun mapa (las l.lindes polo menos cámbianlas tódolos años añediendo más comarcas, hehe).

Si quies falar con xente coherente del sur del cordal recomiéndote esta páxina: www.furmientu.org. Son xente de Zamora que se dedican namás al tema l.lingüísticu (Conceyu Xoven yía una organización política ya los sous argumentos respuenden a intereses políticos) ya trabayan muito bien. Tienen una resvista cuatrimestral (en papel ya online) con cuentiquinos, pequenos vocabularios, noticias...

Tamién tán los de Facendera pola Llingua, tán mui paraos últimamente pero sei de bona tinta que siguen esistiendo ya agradecerán tódolos apoyos. Esos son de L.lión.

Un saludu, a ver si m'animo a escribir daqué más un día d'estos.

trasgu dijo...

Asina que Facendera nun morrió???
Allégrome, los otros (fueyu, toralín, la barda) tan toos baxo´l paragües de Conceyu Xoven y el so llïoueïnesïsmu, tando tan mal como ta la llingua en Llión mecela cola política pue ser ferila de muerta. Salú collaciu y a escribir, nun mos va dexar asina!!!

Ayandés dijo...

Nun morréu, namás tuvo parada un tiempu. Cada ve conozo más xente por al.lí contra CX ya los sous satélites ya con ganas de trabayar, asina que namás yía custión de tiempu que vúelvamos ver a Facendera moviéndose.

La esfoyaza dijo...

Gracies Ayandés pol to comentariu nel mio blog. Agradécense ciertos mensaxes embaxo la tormenta que me ta cayendo.

Mui interesante'l to blog. Encamiéntote a que lu faigas públicu nel directoriu del blogs qu'hai dafechu n'asturianu http://www.directoriu.blogspot.com/

Saludos.